KOROPACK

Geus aya dua jam. Hapé di panteng. Diteuteup. Digésér-gésér. Poto wanoja mapaésan halaman fésbuk. Matana cureuleuk. Biwirna ambucuy. Kareueut. Rambut diségi. Jiga Hinata dina kartun Naruto. Duka kunaon. Haté téh asa beuki maskét. Inget kana ogona. Mun seug ngabales inbok ti kuring. Asa kumerenah wé inbokan jeung manéhna. Naon nu diobrolkeun bisa nyambung. Jadi panjang.

"Lur.. mani anteng kitu." ceuk Acéng  bari ngasongkeun roko.
"Keur bingung sabenerna mah" némbal téh bari ngirim pesen.
"Bingung kunaon?" Acéng jiga nu hariwang.
"Jigana mah pamajikan, ku kuring bakal di serahkeun" gutret deui nulis pesen.
"Naha bisa kitu? Naon sababna?" Acéng panasaran.
"Ieu!" Kuring ngasongkeun hapé

Acéng curinghak. Rewas. Kusiwel. Hapéna di kaluarkeun. Asup kana fésbuk. Notifna loba. Komo inbokna. Pesen nu can kabuka. Rét ka kuring. Rét kana hapé. Paromanna robah. Jiga nu bingung.