KOROPACK

Geus tilu bulan. Can panggih jeung sampayan haté. Kadayeuh. Jualan kurupuk. Boga niat. Ayeuna kacumponan. Sanajan masih nyésa. 32 bulan. Diusapan. Dieulapan. Kacéprétan. Gancang dimandian. Komo mun bolokot. Cadu kasebutna. Warna hideung. Polét beureum. Garpu tala. Jadi ciri. Mun dipaké kudu semu dongko. Mun nikung. Tilep banting. Tur méh antel aspal.

"Menggeus..Jang! Montong dicoo waé.. Anggursi tepungan tuh Néng Ocoh.. Pulang anting ti kamari.. Karunya..." Ema néngtréwélang. Bari mulak-malik poé ranginang.

"Yu.. ah.. " Bari di tepak. Distater. Sorana. Agem. Caang bulan. Sésa purnama. Kasawang. Ocoh seuri bungah. Ningal nu hideung polét beureum. Clak. Ngadaplok. Nangkeup. Pageuh. Tonggong asa kateueul kalapa. Biur. Ngulon. Babaturan di parapatan nyurakan. Asa dihatéan. Mengpeng tarik mapag tanjakan. Nikung.

Ckkiiiittt.. Bujur motor asa aya nu najong. Mangpéng. Ngénca. Nyorolok. Mawa awak. Nyangsaya na dapuran awi. Di pencrong kunu ranggéténg. Sihung.